الحلقة الأولى
كان يا
ما كان ولا يحلى الكلام إلا بذكر النبى ﷺ
الأولاد الحلوين يقولوا ايه : ﷺ، ممتازين
مين يا أولاد احسن واحد فى الدنيا؟ سيدنا محمد ﷺ
سيدنا محمد هو اللى ربنا اختاره عشان يعملنا الصح
والغلط، والحلال والحرام، ربنا اختار سيدنا محمد عشان يعلمنا الأعمال الطيبة،
والأخلاق الجميلة، ويعلمنا ديننا الإسلام، واللى هيحب سيدنا محمد ويسمع الكلام
اللى ربنا علمه لسيدنا محمد، ربنا هيحبه وهيدخله الجنة، والجنة دى أحلى مكان اللى
فيه كل حاجة وأى حاجة احنا عازينها، ومهما فكرنا فى الجنة، الجنة بردوا أحلى من
تفكيرنا.
كان زمان زمان سيدنا إبراهيم بيبنى الكعبة ومعاه ابنه
إسماعيل، سيدنا إبراهيم وهو بيبنى الكعبة وقف يدعى ربنا إنه يبعت للناس واحد رسول،
يعلمهم الصح والغلط، والحلال والحرام، عشان يخليهم ناس كويسين وطيبين وبيعملوا
الخير، فربنا استجاب الدعاء واختار سيدنا محمد إنه يكون المعلم اللى يعلم كل الناس
أوامر ربنا.
أبو سيدنا محمد كان اسمه ايه؟
كان اسمه عبدالله بن عبد المطلب.
وأمه كان اسمها ايه؟
آمنة بنت وهب.
سيدنا محمد لما كان لسه جوا بطن أمه مات أبوه (عبدالله
بن عبد المطلب)، مات ةمكنش شافه لأنه مكنش لسه اتولد.
عارفين سيدنا محمد اتولد إمتى؟
اتولد عام الفيل، يعنى فى نفس السنة اللى أبرهه الشرير
كان عايز يهدم الكعبة بالفيل الضخم، بس ربنا عاقبه وكل الجنود الأشرار اللى كانوا
معاه ومقدرش يهدم الكعبة.
أول لما أمه (آمنة بنت وهب) ولدته، نادت على جده أبو
أبوه، اسمه عبد المطلب، شافه لقاه طفل شكله جميل أووى، فأم سيدنا محمد قالت لجده:
أنا لما كنت بنام كنت بحلم حلم جميل أوى، كنت بشوف نور بيخرج من جسمى وبينور
الدنيا كلها، فجده فرح أووى وحس إن الطفل دا مش هيبقى طفل عادى، وإنه لما يكبر
هيعلم الدنيا كلها وهيخلى الناس تشوف الحاجات الصح زى النور اللى بيخلينا نشوف كل
حاجة فى حياتنا.
جده قال: أنا هسميه محمد، مكنش فيه حد ساعتها اسمه محمد
خالص، إلا عدد قليل جدا جدا جدا، لأن العرب لما سمعوا إن نبى آخر الزمان سيكون
اسمه محمد، فسموا بهذا الإسم رجاء منهم إنه يكون ابنهم هو هذا النبى.
فالناس سألته: يعنى ايه محمد؟
قالهم يعنى ربنا فى السما يحبه ويحب أخلاقه الجميلة،
والناس فى الأرض تحبه وتحب أخلاقه الجميلة. ﷺ
لمشاهدة الحلقة مصورة ،،،، اضغط على الرابط التالى:
اترك تعليقك، وسوف يتم الرد عليك فى أسرع وقت.